Sernám   /   Um Sernám   /   Til foreldur
Skriva út

Til foreldur

Sernámsfundurin er staðið, har stúranir hjá starvsfólkum á stovni ella skúla og/ella foreldrunum verða umrødd.

Spurningurin "Hvør er stúrin um hvat?" leggur dent á stúran hjá starvsfólkum og/ella foreldrum. Stovnurin/skúlin fær samtykki frá foreldur um, at teirra barn verður umrøtt (við navni ella ikki).

 

Skrá til sernámsfund verður gjørd av stovni ella skúla og send til Sernám, har greitt verður frá stúranini, ið ynski er at tosa um. Henda skrá skal vera Sernámi í hendi í seinasta lagi 7 dagar innan sernámsfundurin verður hildin.

Eftir sernámsfundin, ið starvsfólk í Sernámi hevur saman við starvsfólkum á stovni/skúla, verður avgjørt, um eitt upplýsingarskjal skal sendast til Sernám.

Upplýsingarskjalið skulu bæði foreldur og stovnur/skúli fylla út. Umráðandi er, at ein lýsing av stúranini frá foreldrum og frá stovni/skúla er á upplýsingarskjalinum, umframt undirskrift frá foreldrum/verja.

Upplýsingarskjøl innkomin eftir avtalu millum Sernám og stovn/skúla/foreldur verða viðgjørd í Sernámi, har støða verður tikin til, hvussu farast skal fram. Tá hetta er avgjørt, hoyra foreldur og stovnur/skúli frá okkara starvsfólki um, hvat hendir víðari.

 

Ynskiligt er, at foreldur hava vent sær til viðkomandi stovn ella skúla við sínari stúran. Foreldur eru altíð vælkomin at venda sær til Sernám eisini.

 

Um barnið vegna sjúku/brek ikki er á stovni ella í skúla, verður ráðgeving frá Sernámi vanliga veitt í samráð við foreldur og eitt nú heilsuverk og/ella almannaverkið. 

 

Sertilboð

Um ella tá foreldur saman við viðkomandi skúla ella dagstovni meta, at teirra barn hevur tørv á serligari skúlaskipan og ynskja at teirra barn verður upptikið í sertilboði ella serskúla, verður hetta tikið upp saman við Sernámi.

Uppgávan hjá Sernámi er m.a. at gera tilmæli saman við foreldrum ella verja hjá barninum til viðkomandi tilboð. Hetta verður gjørt sambært "Kunngerð um serundirvísing, sernámsfrøðilig átøk og sernámsfrøðiligan stuðul".

Foreldur kunnu í hesum sambandi venda sær til stovn ella skúla, sum barnið er knýtt til, ella beinleiðis til Sernám. Sernám vil í hesum føri, saman við foreldrunum, venda sær til stovn ella skúla barni er knýtt til.